Rammaslagskvæði: "Verum hress".

Hýrt má ræða, hnoða skjall,

hanna sinnisþankann,

skýrt þá fræða, skoða spjall,

skanna minnisbankann.

 

Fjalla sóma eygi enn,

alla hljóma miða.

Hjalla róma sveigi senn,

sælli óma friða.

 

Bragur prýðir ljóða lund.

Lyftu vorsins nýju stund.

Dagur skrýðir góða grund,

giftu þorsins, hlýju mund.

 

Mundu að yrkja á óskavori,

andann hylla í vænum smelli,

stundu virkja visku, þori,

vandann stilla í grænum hvelli.

 

Rækja áttu sanna sátt,

sækja hátt og unna dátt,

bæta ljóð og manna mátt,

mæta fróð í sunnanátt.

 

Fríður hljómur fagnar, gleður

fljóða róminn mæta hér.

Þýður ómur þagnar, kveður,

þjóða ljóminn kæta fer.

 

Lækur niðar, ljómað fær,

lindin kliðar hljómatær,

spræk hún iðar, ómar kær.

Yndið friðar blómamær.

 

Bjarni Th. Rögnvaldsson

Athugasemdir

[Erlingur Þorsteinsson (IP-tala skráð) 25.10.2009 kl. 16:38]

frábær kveðskapur